СТАТУТ КНЯЗЯ ЯРОСЛАВА ПРО ЦЕРКОВНІ СУДИ (ПРОСТОРОВА РЕДАКЦІЯ)

1. А се аз, князь великыи Ярослав, сын Володимеров, по данию отца своего сгадал есмь с митрополитом киевским и всея Руси Иларионом, сложихом греческий Номоканон; еже не подобаетъ сих тяж судити князю, ни бояром его, ни судиям его, дал есмь митрополиту и епископом: роспусты по всем городом, 10-ю не­делю мыта к церкви и к митрополиту, а людей его не даяти мыта нигде; осминечье дал есми.

2. Аще кто умчить^[56] девку или насидить, аще боярская дочи бу­детъ, за сором ей 5 гривен злата, а митрополиту 5 гривен золота;

аще будеть менших бояр, гривна золота ей, а митрополиту гривна золота;

а добрых людей будеть, за сором рубль, а митрополиту рубль; на умыцех по 60 митрополиту, а князь их казнить.

3. Аще кто пошибаеть^[57] боярскую дочерь или боярскую жену, за сором ей 5 гривен золота, а митрополиту 5 гривен золота;

а меньших бояр — гривна золота, а митрополиту — гривна золота;

нарочитых людей — два рубля, а митрополиту два рубля;

простый чади — 12 гривен кун, а митрополиту 12 гривен, а князь казнитель.

4. Аще же пустить^[58] боярин жену великих бояр, за сором ей 300 гривен, а митрополиту 5 гривен золота, а менших бояр гривна золота, а митрополиту гривна золота;

а нарочитых людии 2 рубля, а митрополиту 2 рубля;

простои чади 12 гривен, а митрополиту 12 гривен, а князь казнить.

5. Аще же девка блядеть^[59] или дитяти добудетъ у отца, у матери или вдовою, обличивше, пояти ю в дом церковный.

6. Тако же и женка без своего мужа или при мужи дитяти добудетъ, да погубить, или в свиньи ввержеть, или утопить, об­личивши, пояти и в дом церковный, а чин ю паки род окупить.

7. Аже девка засядетъ великих бояр, митрополиту 5 гривен золота, а менших бояр — гривна золота, а нарочитых людии — 12 гривен, а простои чади рубль.

8. Аже муж от жены блядеть, митрополиту нет кун, князь казнити.

9. Аже муж оженится иною женою, а с старою не роспустит- ся, митрополиту вина, молодую поняти в дом церковный, а с старою жити.

10. Аже поидеть жена от своего мужа за иныи муж или иметь блясти от мужа, ту жену поняти в дом церковный, а новоженя^[60] в продажи митрополиту.

11. Аще будетъ жене лихыи недуг, или слепа, или долгая бо­лезнь, про то ея не пустити.

12. Тако же и жене нельзе пустити мужа.

13. Аще кум с кумою блуд створить, митрополиту 12 гривен, а опитемии указание от бога.

14. Аще кто зажжетъ гумно, или двор, или иное что, митропо­литу 40 гривен, а опитемию подоимуть, а князь казнить.

15. Аще кто с сестрою блуд створить, митрополиту 40 гривен, а во опитемии указано по закону.

16. Аще ближний род поимется^[61], митрополиту 40 гривен, а их разлучити, а опитемию приймуть.

17. Аще кто иметь две жены водити, митрополиту 20 гривен, а которая подлегла, тую пояти в дом церковный, а первую жену дер­жати по закону. Иметь ли лихо ею держати^[62], казнью казнити.

18. Аще муж роспустится с женою по своей воли, а будетъ ли венчальная, и дадять митрополиту 12 гривен, будетъ ли невен­чальная, митрополиту 6 гривен.

19. Аще жидовин^[63] или бесерменин^[64] будеть с рускою, на иноязычницех митрополиту 50 гривен, а рускую поняти в дом церковный.

20. Аще кто блудить с черницею, митрополиту 40 гривен, а во опитемию^{[65] [66] вложити.}

21. Аще ли кто с животиною блуд створить, митрополиту 12 гри­вен, а во опитемии и в казни.

22. Аще свекор с снохою блудить, митрополиту 40 гривен, а опитемию приймуть по закону.

23. Аще кто з двема сестрами в блуд владеть, митрополиту 12 гривен.

24.Аще кто с падчерицею блудить, митрополиту 12 гривен.

25. Аще деверь’ с ятровию^[67] впадетъ, митрополиту 12 гривен.

26. Аще кто с мачехою в блуд впадетъ, митрополиту 12 гривен.

27. Аще два брата с единою женою, митрополиту 30 гривен, а женку поняти в дом церковный.

28. Аще отец с дочерию владеть в блуд, митрополиту 40 гривен, а опитемию приймуть по закону.

29. Аще девка не въсхощеть замуж, то отец и мати силою дадять. А что девка учинить над собою, то отец и мати митрополиту в вине.

30. Аще кто зоветъ чюжую жену блядию, а будетъ боярьская жена великых бояр, за сором 5 гривен золота, а митрополиту 5 гривен золота, а князь казнить;

а будетъ меньших бояр — 3 гривны золота, а митрополиту рубль;

оже будетъ городскых людей — 3 гривны золота, а митропо­литу рубль;

селенцев — 60 резан, а митрополиту 3 гривны.

31. Аще кто пострижетъ кому голову или бороду, митрополиту 12 гривен, а князь казнить.

32. Аще муж иметь красти конопле или лен и всякое жито, митрополиту 12 гривен. Тако же и женка.

33. Аще муж крадетъ белыа порты^[68], или портища, или полотны, и митрополиту 3 гривны, а тако же и женка.

34. Аще кто иметь красти сватебное и сгородное — все мит­рополиту.

35. Про девку сыр краявши, за сором ей 3 гривны, а что поте­ряно, тое заплатити, а митрополиту 6 гривен, а князь казнить.

36. Аще жена мужа крадеть и обличати ю, митрополиту 3 гривны, а муж казнить ю, и про то не разлучити.

37.Аще кто клеть крадеть, тако же творять.

38. Аще жена будетъ чародеица, наузница, или волхва, или зелейница, муж, доличив, казнить ю, а не лишиться.

39. Аще мужа два бьетася (по) женьскы, любо одереть, любо укусить, митрополиту 12 гривен.

40.Аще жена бьеть мужа, митрополиту 3 гривны.

41.И жене две бьется, митрополиту 6 гривен на виноватой.

42. Аще который муж бьеть чужую жену, за сором ей по закону, а митрополиту 6 гривен.

43. Аще ли сын биеть отца или матерь, да казнятъ его волос- тельскою казнию^[69], а митрополиту в дом церковный такий отрок.

44. Иже чернець или черница впадетъ в блуд, тех судити мит­рополиту.

45. Тако же или поп, или попадиа, или проскурница, а впа­дутъ в блуд, тех судити митрополиту опроче миру, а въ что их осудить, волен.

46. Аще поп, или чернец, или черница упнеться без времени, митрополиту в вине.

47. Аще кто что поганое съясть по своей воли, или кобылину, или медведину, или ино что отреченое, митрополиту в вине и в казни.

48. Иже поп дети крестить в чюжем уезде иного попа, разве нужа или при болезни, а что створить крещеньское не во своем уезде, митрополиту в вине.

49. C некрещеным, ни иноязычником, или от нашего языка бу­детъ (но) с некрещеным, ведая ясть и пиеть, митрополиту в вине.

50. Аще кто с отлученым ясть и пиеть, да будеть сам отлучен.

51. Аще кто с бесерменкою или с жидовкою блуд створить, а не лишиться — церкви отлучиться и христьян, а митрополиту 12 гривен.

52. Аще чернец или черница [рос]стрижються, митрополиту 40.

53. А сими винами разлучити мужа с женою:

1). А се первая вина. Услышитъ жена от иных людей, что ду­мати на царя или на князя, а мужу своему не скажетъ, а опосли обличиться — разлучити.

2). А се вторая вина, оже муж застанетъ свою жену с любодеем или учинить на ню послухы и исправу, разлучити.

3). А се 3-я вина, аще подумаетъ жена на своего мужа, или зели­ем, или инеми людьми, или иметь ведати что мужа еа хотятъ убити, а мужу своему не скажетъ, а опосле объявиться, и разлучити и.

4). А се 4-я вина, аще без мужня слова иметь с чюжими людь­ми ходити, или пити, или ясти, или опроче мужа своего спати, потом объявиться, разлучити и.

5). А се 5-я вина, оже иметь опроче мужа ходити по игрищам, или в дни, или в нощи, а не послушати иметь, розлучити и.

6). А се 6-я вина, оже жена на мужа наведетъ тати, велить покрасти, или сама покрадеть, или товар, или церковь покрадши, инем подаеть, про то разлучити.

54. А что ся дееть в монастырьскых делех, в церковных, в самех монастырех, да не вступається князь, ни волостель, безатщина приидеть к волостелю митрополичю.

55. Аще кто Устав мой и уставление мое порушить, или сынове мои, или внуци мои, или правнуци мои, или от рода моего кто, или от рода боярьскаго бояр моих, а вступить в суд митрополич, что есмь дал митрополиту церковный суды, епискупом, по пра­вилом святых отец, судивше, казнити по закону.

56. А хто иметь судити, станетъ съ мною на страшней суде пред богом, и да будеть на нем клятва святых отец 300 и 18, иже в Никии и всех святых. Аминь.