Житіє 7 ПІЗНЄ українське ПРОЛОЖНЕ ЖИТІЄ СВЯТОГО Володимира ■

Цю редакцію В. Перетц вважає першою спробою створення відмін­ного українського тексту (адже, подібно до інших російських істориків, давні українські пам'ятки він відносить до абстрактно “дрєвнєру- ськіх”).

Можна припустити, що Житіє, дійсно, створене до інших пізніх українських переробок, або ж його автор, локалізований у Білорусі, не знав про них.

Мѣсяца июля 15.

Успеніе блаженнаго кназя Володімеря, крестившаго Рускую землю

Был убо Володимер сын Святославль, от поколения варажского; первей же ку болваном великие офѣри чинил по отцовскому приказаню; по тым, як восхотел господь бог собрати людей много, наполнил ласку святого духа и востав, як от сна от лю- того, и богу служил своему; и послал по всих краех, пытаючи законов, як веруют. И умиловал святую вѣру греческую, як свечу на лихтару, [и рече] в собе: “Тое учиню: пойду у землю их и буду пустошити месты их, и знайду у них учителя”. Кото- рий умыслил, той и сотвори, и пошол воевати, взял Корсюн и посла к цару кгрецкому просячи, “абы взял сестру твою за себе. А ежели не даси, то учиню замку твоему, як и тому учинил”.

А ежели охрестисся, то возмеш сестру мою за себе и еще болш царства небесного”. И мовил Володимер: “Добре, я так учиню; пришедши от тебе с царицою твоею, да крестит мя”. В том же часе Володимер впал был в недуг обема очима в слепоту. И рекла царица Анна, пославши до него с таким словом: “Царю Володимере, ежели не охрестишся, то не збудеш тое слепоты”. А он рекл: “Окрестите мя, бо я на тое сам закрашаю”. Потом коли охрестился, учинило се чудо великое: увышол он во свя­тую купель и проглянул очима и бывши як бы николи не было слепоты, хвалил господа бога за такое добродейство; просвѣщон был волею всѣх бога и веселился.

Пришол до Киова и побил уси боги свое, Перуна, Хорса, знову бог его был Мокош, и потом вся боги побил и у Днепру пото­пил. Малыя и великия киями почали бити, а они ревли, як волы, и плынули у верх воды. И дети малыя каменем его затопили. И потом возвал всих много людей и заказал им, абы ишли крес­титися, назначил им день и то им приказал: “Ежели хто не най­дется утро на реце, то будеть противным мне”. И сышолся весь град, всяк возраст мущинский и женский и малых детей, сыш- лисе на реку Почайну и младенцы на верху воды стояху, одны до пояса, другия брядят. А священики на брегу стоят, молитвы отправуют над крестимыми, и оттуль наречеся мѣсто святое, где тепер царство небесное церкви святых мученик Туровѣ, по- иман был первый ходотай нашему спасению.

Володимер же поглянул на небо, помолився за христианы, рекл: “Боже, которий сотворил небо и землю, узгляни на новоокре- щеныя люди тыя и дай им вѣдети тебѣ, истиннаго бога, и той утверди их во правовѣрную вѣру, и мне, господи, помози на сопротивныя, и надѣюся на твою державу, покору блюзнерство Арк. 871 поганское”. И казал людем ставити // церкви по всим градом и селом, и сам збудовал церкву святыя богородица и украсил мудре. Пребыв же неколико лет и почал хореть и преставився ку господу богу мѣсяца июля 15 дня.

Але як тебе маем по достоянию хвалити, сотворшаго дѣла равно апостолом святым? Хвалит бо обою Рим, земля папежская, Петра й Павла апостола, и наша Иоанна богослова, Египетская Марка евангелиста, Антиохенская Луку, Греческая Андрея, Московская сторона и вся Бѣлая Русь тобе же, княже, Володи- мера, яко господня апостола; молебными пѣсньми память твою празднуем, похвалныя вѣнца приносим ти и мовим: “Радуйся, блаженный Володимере, принял венец от руки вседержителя бога. Радуйся, святая голова, вож и учитель наш, през которого свѣт правдивый познали християни благочестивии, которому от нас нехай будет похваление за такия справы на честь и на хвалу во тройце едино славимому во безначалныя вѣки вѣком. Аминь”.